ಆನ್‌ಲೈನ್‌ ಸಿಇಟಿ ಕೌನ್ಸಿಲಿಂಗ್‌ ಹೇಗಿರುತ್ತದೆ ?-ಉದಯವಾಣಿ ವರದಿ

• ---

• ಪ್ರಸಕ್ತ ಸಾಲಿನಿಂದಲೇ ಜಾರಿ ; 12 ಸಹಾಯವಾಣಿ ಕೇಂದ್ರಗಳು
• Udayavani | Mar 20, 2012
  

  ಬೆಂಗಳೂರು : ಬಹುನಿರೀಕ್ಷಿತ ವೃತ್ತಿಪರ ಕೋರ್ಸ್‌ಗಳ ಸೀಟು ಹಂಚಿಕೆಯಲ್ಲಿ ಆನ್‌ಲೈನ್‌ ಕೌನ್ಸೆಲಿಂಗ್‌ ಜಾರಿಗೆ 'ನೀಲ ನಕ್ಷೆ' ಸಿದ್ಧಗೊಂಡಿದ್ದು, ಅನುಷ್ಠಾನ ಪ್ರಕ್ರಿಯೆ ಮಾತ್ರ ಬಾಕಿ ಇದೆ.
  
  ಈ ಸಂಬಂಧ ಕಳೆದ ಐದು ತಿಂಗಳಿಂದ ಸೂರತ್ಕಲ್‌, ಹೈದ್ರಾಬಾದ್‌ ಹಾಗೂ ದೆಹಲಿಗೆ ಭೇಟಿ ನೀಡಿ ಅಧ್ಯಯನ ನಡೆಸಿದ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ, ರಾಜ್ಯಕ್ಕೆ ಅನುಕೂಲವಾಗುವ ವಿಶೇಷ ಮಾದರಿಯೊಂದನ್ನು ಈಗ ಕಂಡುಕೊಂಡಿದೆ. ಆ ಮೂಲಕ ದೇಶದಲ್ಲಿ ಮೊದಲ ಬಾರಿ ಎಲ್ಲ ವೃತ್ತಿಪರ ಕೋರ್ಸ್‌ಗಳ ಸೀಟು ಹಂಚಿಕೆ ಆನ್‌ಲೈನ್‌ನಲ್ಲೇ ನಡೆಯಲಿದ್ದು, ಪ್ರಸಕ್ತ ಶೈಕ್ಷಣಿಕ ಸಾಲಿನಿಂದಲೇ ಈ ವ್ಯವಸ್ಥೆ ಜಾರಿಗೆ ಬರಲಿದೆ.
  
  ಈಗಾಗಲೇ ಸೀಟು ಹಂಚಿಕೆ ಪ್ರಕ್ರಿಯೆಯನ್ನು ಸಂಪೂರ್ಣ ಗಣಕೀಕರಿಸಿದ್ದು, ವೈದ್ಯಕೀಯ, ದಂತವೈದ್ಯಕೀಯ, ಆಯುರ್ವೇದ, ಹೊಮಿಯೋಪತಿ, ಯುನಾನಿ ಹಾಗೂ ಎಂಜಿನಿಯರಿಂಗ್‌ ಸೀಟುಗಳು ಆನ್‌ಲೈನ್‌ ಮೂಲಕವೇ ಹಂಚಿಕೆಯಾಗಲಿವೆ. ಇದಕ್ಕಾಗಿ ಪ್ರತಿ ವಿದ್ಯಾರ್ಥಿಗೆ ಲಾಗ್‌ಇನ್‌ ಐಡಿ ಹಾಗೂ ಪಾಸ್‌ವರ್ಡ್‌ ನೀಡುವ ಮೂಲಕ ವಿದ್ಯಾರ್ಥಿಗೆ ಅನುಕೂಲವಾಗುವ ಸೀಟು ಆಯ್ಕೆ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗುತ್ತದೆ. ಹಾಗಾಗಿ, ಈ ಬಾರಿ ಪ್ರಾಧಿಕಾರದ ಕಚೇರಿಗೆ ವಿದ್ಯಾರ್ಥಿಗಳ ಅಲೆದಾಟ ತಪ್ಪಲಿದೆ.
  
  ನೂತನ ವ್ಯವಸ್ಥೆ ಕಾರ್ಯವೈಖರಿ
  
  ಆನ್‌ಲೈನ್‌ ಪ್ರಕ್ರಿಯೆ ಪ್ರಾರಂಭವಾಗುವ ಮೊದಲು ರಾಜ್ಯಾದ್ಯಂತ ಸ್ಥಾಪಿಸಿರುವ 12 ಸಹಾಯವಾಣಿ ಕೇಂದ್ರಗಳಲ್ಲಿ ವಿದ್ಯಾರ್ಥಿಗಳು ದಾಖಲೆ ಪರಿಶೀಲನೆಗೆ ಆಗಮಿಸಿದಾಗ ಆನ್‌ಲೈನ್‌ ಪ್ರಕ್ರಿಯೆ ಕುರಿತು ವಿಶೇಷ ತರಬೇತಿ ನೀಡಲಾಗುವುದು. 1.30 ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪರೀಕ್ಷೆ ಬರೆಯಲಿದ್ದು, ಸುಮಾರು 70 ಸಾವಿರ ವಿದ್ಯಾರ್ಥಿಗಳು ಕೌನ್ಸಿಲಿಂಗ್‌ ಎದುರಿಸುವ ಸಾಧ್ಯತೆ ಇದೆ.
  
  ಸಿಇಟಿ ವೆಬ್‌ಸೈಟ್‌ನ ಹೋಮ್‌ಪೇಜ್‌ನ ಬಲಭಾಗದಲ್ಲಿರುವ ಆಯ್ಕೆಗಳ ಮೇಲೆ ವಿದ್ಯಾರ್ಥಿ ಕ್ಲಿಕ್‌ ಮಾಡಿದರೆ ಕಾಲೇಜು ಹಾಗೂ ಕೋರ್ಸ್‌ಗಳ ಆಯ್ಕೆಪಟ್ಟಿ ಬರುತ್ತದೆ. ನಂತರ ವಿದ್ಯಾರ್ಥಿ ತನ್ನ ಆಸಕ್ತ ವಿಷಯ ಹಾಗೂ ಕಾಲೇಜನ್ನು ಆಯ್ಕೆ ಮಾಡಿಕೊಳ್ಳಬಹುದು. ಆನ್‌ಲೈನ್‌ನಲ್ಲಿ ಹಿಡಿತ ಸಾಧಿಸಿದ ವಿದ್ಯಾರ್ಥಿ ಮನೆಯಲ್ಲೇ ಕುಳಿತು ಕೌನ್ಸಿಲಿಂಗ್‌ನಲ್ಲಿ ಭಾಗವಹಿಸಬಹುದು!
  
  ಆನ್‌ಲೈನ್‌ ಪ್ರಕ್ರಿಯೆಗೆ ಪ್ರತಿ ವಿದ್ಯಾರ್ಥಿಗೆ ರಾಜ್ಯದ 33 ವೈದ್ಯಕೀಯ ಕಾಲೇಜುಗಳು ಹಾಗೂ 186 ಎಂಜಿನಿಯರಿಂಗ್‌ ಕಾಲೇಜುಗಳ 14 ವಿಷಯಗಳನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶವಿದ್ದು, ಎಂಜಿನಿಯರಿಂಗ್‌ ಪ್ರವೇಶ ಬಯಸುವ ವಿದ್ಯಾರ್ಥಿಗೆ 2604 ಆಯ್ಕೆ ಹಾಗೂ ವೈದ್ಯಕೀಯ ವಿದ್ಯಾರ್ಥಿಗೆ 33 ಆಯ್ಕೆಗಳಿರುತ್ತವೆ.
  
  ಆ ವಿದ್ಯಾರ್ಥಿಗಳಿಗೆ ರ್‍ಯಾಂಕ್‌ ಆಧಾರದ ಮೇಲೆ ಮೈಕ್ರೊಸಾಫ್ಟ್ ಹಾಗೂ ಓರಾಕಲ್‌ ತಂತ್ರಜ್ಞಾನವನ್ನು ಬಳಸಿ ತಯಾರಿಸಿರುವ ವಿಶೇಷ ಸಾಫ್ಟ್ವೇರ್‌ ವಿದ್ಯಾರ್ಥಿಗಳಿಗೆ ಸೀಟುಗಳನ್ನು ಹಂಚುತ್ತದೆ. ಪ್ರತಿ ಕಾಲೇಜಿಗೆ ಪ್ರತ್ಯೇಕ ಸಂಕೇತ ನೀಡಲಾಗಿರುತ್ತದೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಅಧಿಕಾರಿಗಳು 'ಉದಯವಾಣಿ'ಗೆ ತಿಳಿಸಿದ್ದಾರೆ.
  
  ವಿದ್ಯಾರ್ಥಿಗಳಿಗೆ ಸಹಾಯವಾಣಿ ಮೂಲಕ ತರಬೇತಿ ನೀಡಿದ ನಂತರ ಸುಮಾರು ಹತ್ತು ದಿನ ಕಾಲಾವಕಾಶ ನೀಡಲಾಗುತ್ತದೆ. ಈ ಅವಧಿಯಲ್ಲಿ ವಿದ್ಯಾರ್ಥಿ ತನ್ನ ಆಯ್ಕೆಯನ್ನು ನಿರ್ದಿಷ್ಟಗೊಳಿಸಿ, ಆನ್‌ಲೈನ್‌ನಲ್ಲಿ ನೀಡುವ ರಸೀದಿಯನ್ನು ಹೊಂದಿರಬೇಕು. ನಂತರ ಸೀಟು ಹಂಚಿಕೆಯ ಅಣಕು ಕೌನ್ಸೆಲಿಂಗ್‌ ಪ್ರಕ್ರಿಯೆ ನಡೆಯುತ್ತದೆ. ವಿದ್ಯಾರ್ಥಿಗೆ ತನಗೆ ಸಿಕ್ಕ ಸೀಟಿನ ಬಗ್ಗೆ ತೃಪ್ತನಾಗಿದ್ದರೆ ಕಾಲೇಜಿನಲ್ಲಿ ಪ್ರವೇಶ ಪಡೆಯಬಹುದು. ಇಲ್ಲದಿದ್ದರೆ ಆಯ್ಕೆಗಳನ್ನು ಬದಲಾಯಿಸಲೂ ಅವಕಾಶವಿರುತ್ತದೆ. ಕೊನೆಗೆ ರ್‍ಯಾಂಕ್‌ ಆಧಾರದ ಮೇಲೆ ಅಂತಿಮ ಸುತ್ತಿನ ಸೀಟು ಹಂಚಿಕೆಯ ಪಟ್ಟಿ ಪ್ರಕಟವಾಗುತ್ತದೆ ಎಂದು ಪ್ರಾಧಿಕಾರದ ಅಧಿಕಾರಿಗಳು ಮಾಹಿತಿ ನೀಡಿದರು.
  
  ಎಂದಿನಂತೆ ಆನ್‌ಲೈನ್‌ ಕೌನ್ಸಿಲಿಂಗ್‌ನಲ್ಲೂ ಪ್ರವೇಶ ಸುತ್ತು, ಮೀಸಲಾತಿ ಸುತ್ತು ಹಾಗೂ ಸಾಂದರ್ಭಿಕ ಸುತ್ತಿನಲ್ಲಿ ವಿದ್ಯಾರ್ಥಿ ಸ್ಪರ್ಧಿಸಲು ಅವಕಾಶವಿರುತ್ತದೆ. ವಿದ್ಯಾರ್ಥಿಗಳ ಅನುಕೂಲಕ್ಕಾಗಿ ಕೌನ್ಸೆಲಿಂಗ್‌ ಕುರಿತು ಮಾಹಿತಿ ಕೈಪಿಡಿ, ಸಿಡಿ ಹಾಗೂ ಟೋಲ್‌ ಫ್ರೀ ನಂಬರ್‌ನ್ನು ಸಿಇಟಿ ಪರೀಕ್ಷೆ ನಂತರ ನೀಡಲಾಗುತ್ತದೆ.
  
  ಸಹಾಯವಾಣಿ ಕೇಂದ್ರಗಳು ಎಲ್ಲೆಲ್ಲಿ ?
  
  ಕಾರವಾರ, ಧಾರವಾಡ, ಬೆಂಗಳೂರು , ಚಿತ್ರದುರ್ಗ, ಗುಲ್ಬರ್ಗ, ಬಳ್ಳಾರಿ, ಮಂಗಳೂರು , ಮೈಸೂರು, ರಾಯಚೂರು, ಧಾರವಾಡ, ಶಿವಮೊಗ್ಗ, ಬಿಜಾಪುರ ಸಹಾಯವಾಣಿಗಳನ್ನು ತೆರೆಯಲಾಗುವುದು.
  
  ಕೌನ್ಸಿಲಿಂಗ್‌ ಪ್ರಕ್ರಿಯೆ ಪ್ರಾರಂಭ ?
  
  1. ಮೇ 3 ಮತ್ತು 4 ಪರೀಕ್ಷೆ.
  
  2. ಮೇ 31 ಫ‌ಲಿತಾಂಶ ಪ್ರಕಟ.
  
  3. ಜೂನ್‌ 6ರಿಂದ 20ರವರೆಗೆ ದಾಖಲೆಗಳ ಪರಿಶೀಲನೆ.
  
  4. ಜೂನ್‌ 10ರಿಂದ 20ರವರೆಗೆ ಆಯ್ಕೆಗೆ ಅವಕಾಶ .
  
  5. ಜುಲೈ 22 ಅಣಕು ಸೀಟು ಹಂಚಿಕೆ ಪಟ್ಟಿ ಪ್ರಕಟ.
  
  6. ಜುಲೈ 25ರಿಂದ ಆಗಸ್ಟ್‌ 13 ಅಂತಿಮ ಮೂರು ಸುತ್ತುಗಳ ಸೀಟು ಹಂಚಿಕೆ ಕೌನ್ಸಿಲಿಂಗ್‌.